NEWS: የኢትዮጵያና እስራኤል ግንኙነት እያደገ መጥቷል – አምባሳደር በላይነሽ

                                 

ኢትዮጵያና እስራኤል ግንኙነት እያደገ መምጣቱን ተሰናባቿ የእስራኤል አምባሳደር በላይነሽ ዛቫዲያ ተናገሩ።

ፕሬዚዳንት ሙላቱ ተሾመ የሥራ ጊዜያቸውን ያጠናቀቁትን በኢትዮጵያ የእስራኤል አምባሳደር በላይነሽ ዛቫዲያን ዛሬ አሰናብተዋል።

ተሰናባቿ አምባሳደር በላይነሽ ከውይይቱ በኋላ እንደገለጹት ሁለቱ አገሮች በተለያዩ መስኮች ያላቸው ግንኙነት ከጊዜ ወደ ጊዜ እየተጠናከረ መጥቷል።

በእርሳቸው የሥራ ጊዜም በአገራቱ መካከል ያለውን ሁለንተናዊ ትብብር ለማጠናከር የሚያስችሉ በርካታ የሁለትዮሽ ሥምምነት መፈረማቸውን ጠቅሰዋል።

የተደረሱት ሥምምነቶች በሳይንስና ቴክኖሎጂ፣ በጤና፣ በትምህርት፣ በቱሪዝም፣ በግብርና እና በሌሎች ዘርፎች ላይ ያተኮሩ መሆናቸውን አምባሳደሯ ገልጸዋል።

የአገራቱን የትብብር አድማስ ለማስፋት የተደረሱትን ሥምምነቶች ወደ ተግባር የሚቀይር ኮሚቴ ተቋቁሞ ሥራዎች መጀመራቸውንም ነው ያነሱት።

በቆይታቸው ወቅት 150 ሺህ ቤተ – እስራኤላዊያን ኢትዮጵያን እንዲጎበኙና ኢንቨስት እንዲያደርጉ መፈቀዱ ከተመዘገቡት ስኬቶች መካከል ተጠቃሽ መሆናቸውን አስታውሰዋል።

“ጠቅላይ ሚኒስትር ኃይለማርያም እስራኤልን መጎብኘታቸውና በተመሳሳይም የእስራኤሉ አቻቸው ቤንያሚን ኔታናየሁ ኢትዮጵያን መጎብኘታቸው ከተሰሩት ሥራዎች መካከል ይጠቀሳሉ” ብለዋል።

እነዚህም ሥራዎች ባለፉት ዓመታት የሁለቱ አገሮች የሁለትዮሽ ግንኙነት እያደገ መምጣቱን እንደሚያመላክቱ ገልጸው በቀጣይም “ግንኙነቱ ይበልጥ እንዲጠናከር እሰራለሁ” ብለዋል። 

ፕሬዚዳንት ሙላቱ ተሾመ በበኩላቸው አምባሳደሯ በቆይታቸው የሁለቱ ሀገራት ግንኙነት ወደ ላቀ ደረጃ እንዲሸጋገር ላበረከቱት አስተዋፅኦ ምስጋና አቅርበዋል።

ርካታ የእስራኤል ኩባንያዎች በኢትዮጵያ ኢንቨስት እያደረጉ መሆኑን ገልጸው፥ ይኸው ተግባር ተጠናክሮ እንዲቀጥል አምባሳደሯ የጀመሩትን ሥራ ሊገፉበት እንደሚገባ ተናግረዋል። 

እስራኤል በሳይንስና ቴክኖሎጂ ዘርፍ የካበተ ልምድ ያላት አገር መሆኗን ያነሱት ፕሬዚዳንት ሙላቱ፥ ከዚህም ኢትዮጵያ ልምድ መቀመር እንደምትሻ ነው ለአምባሳደሯ የገለጹት።

በዚህም ብዙ መሥራት እንደሚጠይቅ ፕሬዚዳንቱ መናገራቸውን ውይይቱን የተከታተሉት በፕሬዚዳንት ጽህፈት ቤት የፕሮቶኮልና ኮሙዩኒኬሽን ጉዳዮች ዳይሬክተር አቶ አሸብር ጌትነት ገልጸዋል። 

ምንጭ:- ኤፍ ቢ ሲ(FBC)

Advertisement