NEWS: ኪም ጆንግ ኡን ብዛት ያለው ተተኳሽ ሮኬት እንዲመረት አዘዙ:;

                                     

የሰሜን ኮሪያው መሪ ኪም ጆንግ ኡን ብዛት ያለው ተተኳሽ ሮኬት እንዲመረት ትዕዛዝ አስተላለፉ።

ኪም ትዕዛዙን ያስተላለፉት በሃገሪቱ ሚሳኤል አምራች ኬሚካል ተቋም ጉብኝት ባደረጉበት ወቅት ነው።

በጉብኝታቸውም የተቋሙ ሰራተኞች ብዛት ያላቸውን ተወንጫፊ ሮኬቶች እንዲያመርቱ ትዕዛዝ ማስተላለፋቸውን የሃገሪቱ ሚዲያ ተቋማት አስታውቀዋል።

ኪም በካርበን ውህድ የሚሰሩ ተጨማሪ ተተኳሽ ሮኬቶችንና ሚሳኤሎችን እንደሚፈልጉ መናገራቸውንም የሃገሪቱ ቴሌቪዥ ጣቢያ ዘግቧል።

በቴሌቪዥን ጣቢያው በተላለፈው ዘገባ ፒዮንግያንግ ከዚህ በፊት ያልነበራት አይነት የሚሳኤል ዲዛይን የሚያሳይ ፎቶም ታይቷል ነው የተባለው።

“ፑክ ጉክሶንግ 3” የተሰኘው ሚሳኤል ፒዮንግያንግ አለኝ ከምትለው ሚሳኤል አይነቶች የተለየ ነውም እየተባለ ነው።

ከዚህ ባለፈም “ሃውሶንግ 13” አልያም “ሃውሶንግ 11” ሊሆን ይችላል የተባለ ሚሳኤልም፥ በዜናው ላይ መታየቱንም ነው የዘርፉ ተንታኞች የተናገሩት።

እነዚህ ሚሳኤሎች አህጉር አቋራጭ ሲሆኑ፥ በቀላሉ ኢላማቸውን መምታትና ማውደም የሚችሉ ናቸውም ተብሏል።

የአሁኑ የኪም ትዕዛዝ የአሜሪካው የውጭ ጉዳይ ሚኒስትር ሬክስ ቲለርሰን፥ ፒዮንግያንግ ወደ ሰላማዊ ድርድር ትመጣለች የሚል እምነታቸውን ከገለጹ በኋላ የተሰጠ ነው።

በአንጻሩ ፕሬዚዳንት ዶናልድ ትራምፕ ተቃውሞ ባስተናገዱበት የፎኔክስ አሪዞና ሰልፍ ላይ፥ ኪም ጆንግ ኡን አሜሪካን ማክበር ጀምሯል ሲሉ ተደምጠዋል። 

ፒዮንግያንግ ካለፈው አመት ጀምሮ በርካታ ሚሳኤሎችን ስታስወነጭፍ ሁለት የኒውክሌር ሙከራዎችን ደግሞ አድርጋለች።

ይህ ሁኔታ ደግሞ ከበርካቶች ዘንድ በተለይም ከአሜሪካና አጋሮቿ ውግዘትን አስከትሎባታል።

ከሶስት ሳምንታት ጀምሮም ከዋሽንግተን ጋር እሰጥ አገባው ውስጥ ገብተዋል።

ለዚህም በፓሲፊክ ውቅያኖስ ላይ በሚገኘው የአሜሪካ ወታደራዊ ግዛት በሆነው ጉዋም ላይ ጥቃት እፈጽማለሁ ስትልም ዛቻና ማስፈራሪያ ስትሰነዝር ቆይታለች።

አሜሪካ በበኩሏ ፒዮንግያንግ ለምትወስደው እርምጃ ጠንካራ አጸፋዊ ምላሽ እንደሚጠብቃት ስታስጠነቅቅ ቆይታለች።

ባለፈው ሳምንት ደግሞ ከዚህ ሃሳቧ በተለየ፥ እርምጃ ለመውሰድ የአሜሪካን ድርጊት መነሻ አደርጋለሁ ብላ ነበር።

ግን ዋሽንግተን ፒዮንግያንግን ይረዳሉ ባለቻቸው የቻይና እና ሩሲያ ግዙፍ ተቋማትና ግለሰቦች ላይ ማዕቀብ በመጣሏ፥ ለዘብ ያለ የመሰለው የሃገራቱ ፍጥጫ መልኩን እንዳይቀይር ተሰግቷል።

በርካቶችም የአሁኑ የኪም ጆንግ ኡን ትዕዛዝ ፍጥጫውን እንዳያከረው በሚል ስጋታቸውን እየገለጹ ነው፤ አካሄዱ ጦር ለመስበቅ ዝግጅት ይመስላል በሚል።

ምንጭ:- ኤፍ ቢ ሲ(FBC)

 

Advertisement