NEWS: አሜሪካ ከሰሜን ኮሪያ ጋር በተገናኘ በቻይና እና ሩስያ ኩባንያዎች ላይ አዲስ ማዕቀብ ጣለች::

                                  

አሜሪካ ከሰሜን ኮሪያ የኒዩክሌር ፕሮግራም ጋር ግንኙነት አላቸው ባለቻቸው የቻይና እና ሩስያ ኩባንያዎች ላይ አዲስ ማዕቀብ መጣሏን ይፋ አደረገች።

የአሜሪካ የገንዘብ ሚኒስቴር ባወጣው መግለጫ እንዳመለከተው፥ በማዕቀቡ ኢላማ የተደረጉት 10 ኩባንያዎች እና ስድስት ግለሰቦች ፒዮንግያንግ የኒዩክሌር እና ሚሳኤል ፕሮግራሟን እንድታዘምን ተሳትፎ አድርገዋል።

አዲሱ ማዕቀብም ኩባንያዎቹ ከሰሜን ኮሪያ ጋር ያላቸውን ኢኮኖሚያዊ ግንኙነት እንዲያቋርጡ ያደርጋል የተባለ ሲሆን፥ አብዛኞቹ ማዕቀቦችም በቻይና በሚገኙ ኩባንያዎች ላይ እንደሚጣሉ ተገልጿል።

ማዕቀቡ የሚጣልባቸው ኩባንያዎች እና ግለሰቦች ዝርዝር ግን ይፋ አልተደረገም።

ማንኛውም ሰሜን ኮሪያን የሚደግፍ አካል በአሜሪካ ምንም አይነት የንግድ እንቅስቃሴ እንዳያደርግ ይታገዳል ብለዋል ሚኒስትሩ ስቲቭ ኑቺን።

የሀገሪቱን የኒዩክሌር እና ሚሳኤል ፕሮግራም የሚደግፉ አካላትን ከአሜሪካ የፋይናንስ ስርአት ውጭ በማድረግም በሰሜን ኮሪያ ላይ ጫና መፍጠሩ ተጠናክሮ እንደሚቀጥል ተናግረዋል። 

በቻይና እና ሩስያም ሆነ ሌሎች ሀገራት የሚገኙ ግለሰቦች እና ኩባንያዎች፥ የኪም ጆንግ ኡን አስተዳደር ጠቅላላ ውድመት የሚያደርሱ እና ቀጠናውን የሚያተራምሱ የጦር መሳሪያዎችን እንዲያመርት መደገፋቸው ተቀባይነት የለውም ነው ያሉት ሚኒስትሩ።

ቤጂንግ በአለም አቀፉ ማህበረሰብ እና በአሜሪካ ጫና ከፒዮንግያግ ጋር ያላትን የንግድ ግንኙነት በተወሰነ መንገድ መቀነሷን ትናገራለች።

 ይሁን እንጂ የቻይና ኩባንያዎች አሁንም ለተገለለችው ሰሜን ኮሪያ ዋነኛ የንግድ አጋር ናቸው።

ሰሜን ኮሪያ ሁለት አህጉር አቋራጭ ሚሳኤሎችን መሞከሯን ተከትሎ የተባበሩት መንግስታት ድርጅት ባለፈው ወር ላይ በሀገሪቱ አዲስ ማዕቀብ እንዲጣል መወሰኑን ተከትሎ የኮሪያ ልሳነ ምድር ውጥረት አይሏል።

ምንጭ:- ኤፍ ቢ ሲ(FBC)

Advertisement