NEWS: የሀዋሳ አውሮፕላን ማረፊያ ተርሚናል መሠረት የማውጣት ሥራ ተጠናቀቀ::

 

                                              

በሀዋሳ አውሮፕላን ማረፊያ እየተገነባ ያለው የመንገደኞች ማስተናገጃ ተርሚናል መሠረት የማውጣት ሥራ ተጠናቀቀ።

የኢትዮጵያ ኤርፖርቶች ድርጅት ለፋና ብሮድካስቲንግ ኮርፖሬት በላከው መግለጫ፥ ከ126 ሚሊየን ብር በላይ ወጪ ተደርጎበት በመገንባት ላይ የሚገኘው ተርሚናሉ እስከ 20 ዓመት ድረስ እንዲያገለግል ታስቦ ነው እየተሰራ ያለው።

በተጨማሪም የዕቃ ጭነት (የካርጎ) አገልግሎት ለማስጀመር ተጨማሪ ቦታ በማስፈለጉ የክልሉ መንግስት ምላሽ እየተጠበቀ መሆኑን ድርጅቱ ጠቁሟል።

የአውሮፕላን ማረፊያው የተርሚናል ግንባታ በኤፍ ኢ ኮንስትራክሽን ስራ ተቋራጭ እየተከናወነ ሲሆን፥ ግንባታው በአንድ ዓመት ጊዜ ውስጥ እንደሚጠናቀቅ ይጠበቃል። 

ተርሚናሉ አገልግሎት መስጠት ሲጀምርም በአንድ ጊዜ 118 መንገደኞችን በምቾች የማስተናገድ አቅም ይኖረዋል ተብሏል።

የመንገደኞች ማስተናገጃ ተርሚናሉ የአካባቢው ልዩ መለያ የሆኑትን በሀዋሳ ሀይቅ ላይ የሚንሳፈፉ ወፎችን እና በአካባቢው በስፋት የሚታወቀው እና ተወዳጅ የሆነውን በሳጠራ የሚሰራ የቤት አሰራር የሚያሳይ ነው። 

ከሀዋሳ ከተማ ወደ አውሮፕላን ማረፊያው መዳረሻ እየተሰራ ካለው 22 ኪሎ ሜትር ውስ መንገድ 5 ኪሎ ሜትር መንገድ በ42 ሚሊየን ብር ወጭ በኤርፖርቶች ድርጅት ተሰርቷል። 

አውሮፕላን ማረፊያው 3 ነጥብ 12 ኪሎ ሜትር ርዝመት እና 60 ሜትር ስፋት ያለው የአውሮፕላን ማረፊያና መንደርደሪያ ኮንክሪት አስፓልት እንዳለውም ነው ድርጅቱ የገለፀው። 

በተጨማሪም በአንድ ጊዜ ስድስት አውሮፕላኖችን ማቆም የሚያስችል የአውሮፕላን ማቆሚያ ስፍራ (apron) አለው።

የሀዋሳ አውሮፕላን ማረፊያ ሚያዝያ 8 ቀን 2008 ዓ.ም ሥራ መጀመሩ ይታወሳል።

ስራ በጀመረበት ወቅት በሳምንት ለአራት ቀናት በረራ ያስተናግድ የነበረ ሲሆን፥ በአሁኑ ወቅት ሳምንቱን ሙሉ በአማካይ በቀን አራት ጊዜ በረራዎችን በማስተናገድ ላይ ነው።

በ2009 የበጀት ዓመት 1 ሺህ 496 መደበኛና መደበኛ ያልሆኑ በረራዎችን ያስተናገደው አውሮፕላን ማረፊያው፥ ከ48 ሺህ 900 በላይ መንገደኞችን አመላልሷል። 

የአውሮፕላን ማረፊያው በዓመት ከ200 ሺህ በላይ ቱሪስቶችን በመቀበል ላይ የምትገኘውን የሀዋሳ ከተማ ምቹ እና ቀልጣፋ የትራንስፖርት አገልግሎት ተጠቃሚ በማድረግ ላይ ይገኛል።

ምንጭ:- ኤፍ ቢ ሲ(FBC)

 

 

Advertisement