NEWS: አይ ኤስ በስፔን በተሽከርካሪ በፈፀመው የሽብር ጥቃት የ13 ሰዎች ህይወት አለፈ::

                                            

በስፔን ባርሴሎና አሸባሪዎች ሰዎች በተሰበሰቡበት ስፍራ ላይ ተሽከርካሪ በፍጥነት በመንዳት በርካታ ሰዎች ላይ ጉዳት ማድረሳቸው ተነግሯል።

በባርሴሎና ቱሪስቶች በብዛት የሚያዘወትሩት ስፍራ ላይ በነጭ እቃ መጫኛ (ቫን) ተሽከርካሪ በተፈፀመው ጥቃት በትንሹ የ13 ሰዎች ህይወት ማለፉ ነው የተገለፀው።

የስፔን የሀገር ውስጥ ጉዳይ ሚኒስትር ዮዋኪየም ፎርን በትዊተር ገጻቸው ላይ፥ በጥቃቱ 13 ሰዎች መሞታቸውን አረጋግጠዋል።

ህይወታቸውን ካጡ ሰዎች በተጨማሪም ወደ 100 የሚጠጉ ሰዎች ላይ የተለያየ መጠን ያለው ጉዳት መድረሱን ነው ሚኒስትሩ ያስታወቁት።

የከተማዋ ፖሊስ በበኩሉ በአደጋው ጉዳት ከደረሰባቸው ሰዎች ውስጥ 10 ሰዎች አስጊ ሁኔታ ላይ ይገኛሉ ያለ ሲሆን፥ አደጋውም የሽብር ጥቃት ነው ሲል አስታውቋል።

ከጥቃቱ ጋር በተያያዘ እስካሁን ሁለት ሰዎች በቁጥጥር ስር የዋሉ ሲሆን፥ ምን ያህል ሰዎች በጥቃቱ ላይ ተሳትፈዋል የሚለው ግን እስካሁን ግልፅ አይደለም።

ፖሊስ አያይዞም ለሁለተኛ ጊዜ በእቃ መጫኛ (ቫን) ተሽከርካሪ ጥቃት ለማድረስ በዝግጅት ላይ የነበሩ አሸባሪዎችን ማስቆም መቻሉን አስታውቋል።

በዚህም ካምብሪልስ በተባለች ከተማ ውስጥ አምስት አሸባሪዎችን መግደሉንና የተገደሉት አሸባሪዎችም የሚፈነዳ ቀበቶ ታጥቀው እንደነበር ነው ፖሊስ የገለፀው።

የስፔን ጠቅላይ ሚኒስትር ማሪያኖ ራጆይ፥ በባርሴሎና የደረሰው አደጋ “የፅንፈኞች ጥቃት” ነው ብለዋል።

በባርሴሎና ከተማ ለተፈፀመው የሽብር ጥቃትም አሸባሪው ቡድን አይ ኤስ ሃላፊነቱን እንደሚወስድ የገለጸ ሲሆን፥ ጥቃት አድራሾቹም የቡድኑ አባላት መሆናቸውን በቴሌግራም የማህበራዊ ትስስር ገጹ አስታውቋል።

እንደ አውሮፓውያኑ ከ2014 ወዲህ በፈረንሳይ ፓሪስ እና ኒስ፣ በብሪታንያ ለንደን፣ በስዊድን ስቶክሆልም እንዲሁም በጀርመን በርሊን ተመሳሳይ በተሽከርካሪ የተፈፀሙ ጥቃቶች የበርካቶችን ህይወት መቅጠፋቸው ይታወሳል።

ምንጭ:- ኤፍ ቢ ሲ(FBC)

Advertisement