NEWS: ታማኙ ውሻ 10 ዓመታትን ከባለቤቱ መቃብር ጎን በመዋልና በማደር እያሳለፈ ይገኛል::

                                       

በሀገረ አርጀንቲና ካፒቴን የተሰኘው ታማኙ ውሻ ያለፉትን 10 ዓመታት ካበለቤቱ የመቃብር ስፍራ ሳይርቅ ኑሮውን እየገፋ ይገኛል፡፡

ለአምስት ዓመታት ያሳደጉት ባለቤቱ ሚጉኤል ጉዝማን በፈረንጆቹ 2006 በኮርዱባ አካባቢ ድንገት ይሞታሉ፤ በካርሎስ ፓዝ ከተማም ቀብራቸው ይፈፀማል፡፡

እኝህ ሰው ከሞቱ ከጥቂት ወራት በኋላ ካፒቴን ከሚኖርበት ቤት ይጠፋል፡፡

ከጥቂት ቀናት በኋላም የጉዝማን ሚስት የባለቤቷን የመቃብር ስፍራ ለመጎብኘት በሄደችበት አጋጣሚ ውሻውን በስፍራው ስታገኘው በጣም ትደነግጣለች፡፡

ከዚያም እሷና ወንድ ልጇ ውሻውን ወደ ቤት ለመውሰድ ብዙ ጊዜ ሞከሩ፤ ሆኖም ካፒቴን ተመልሶ ከባለቤቱ መቃብር ጎን በመዋልና በማደር ጊዜውን ማሳለፍን መረጠ፡፡

የካፒቴን ልብ በሚወደው ባለቤቱ ሞት ጥልቅ ሀዘን ውስጥ መሆኑን በማወቃቸው በዚያው እንዲኖር ፈቀዱለት፡፡

ለዓመታት ከአሳዳጊው የመቃብር ስፍራ ያልተለየው ውሻው በየቀኑ ምግብ የሚቀርብለት ሲሆን በየዓመቱም ክትባት ይሰጠዋል፡፡

አሁን ላይ ካፒቴን እደሜው 15 ዓመት እድሜ ሞልቶታል፤ በእርጅና ምክንያትም ማየትና መንቀሳቀስ አቅቶታል ነው የተባለው፡፡

ካፒቴን ባለቤቱ የሞቱት በኮርዱባ በመሆኑ በካርሎስ ፓዝ የሚገኘውን የቀብር ስፍራቸውን በምን መንገድ አገኘው የሚለው ጥያቄ የአካባቢውን ሰዎች አስገርሟል፡፡

ላለፉት 25 ዓመታት በውሻ ስልጠና ሙያ እየሰራ የሚገኘው አልዶ ቼቺ ውሻዎች ከባለቤታቸው ጋር የሚያቆራኛቸው ጥብቅ ሃይል አለ ይላል፡፡

“ውሻዎች የድምፅ ሞገዶችን እና የስበት ሃይሎችን የመመርመርና የመለየት ትልቅ ስጦታ አላቸው፥ ካፒቴንም ባለቤቱ የተቀበሩበትን ቦታ በማነፍነፍ አግኝቶ በስፍራው እየኖረ የሚገኘው በዚህ ምክንያት ነው” ብሏል።

ምንጭ:- ኤፍ ቢ ሲ(FBC)

Advertisement