ሻይ መጠጣት ለጉንፋን እንዳንጋለጥ እንደሚካላከል አዲስ የወጣ ጥናት አመልክቷል።
ጥናቱን ያካሄዱት ተመራማሪዎች በሻይ፣ ቀይ ወይንና የመሳሰሉት መጠጦች ውስጥ የሚገኘው “ፍላቭኖይድስ” የላይኛውን የመተንፈሻ አካላችንን የሚያጠቁ ባክቴሪያዎችን የመከላከል አቅም አለው ይላሉ።
ከዚህ ቀደም የነበሩ ማስረጃዎች እንደሚያመለክቱት ከሆነ በአንጀታችን ውስጥ የሚገኙ ማይክሮባክቴሪያዎች እንደ ጉንፋን ላሉ በሽታዎች በቀላሉ እንዳንጋለጥ ይከላከላሉ።
ተመራማሪዎችም በአንጀታችን ውስጥ ከሚገኙ ማይክሮ ባክቴሪያዎች ውስጥ የትኛው ለጉንፋን ያለንን ተጋላጭነት ይቀንሳል የሚለውን ለመለየት ጥናት ሲያካሂዲ ቆይተዋል።
“ለዓመታት ፍላቭኖይድስ የተባለው ንጥረ ነገር የሰውነታችንን በሽታ የመከላከል ስርዓት በማጠናከር ለጉንፋን እና ለተለያዩ ኢንፌክሽኖች እንዳንጋለጥ እንደሚያደርግ ይታወቃል” ይላሉ በአሜሪካው የሴንት ሉዊስ የህጻናት ሆስፒታል የጥናት ቡድን መሪ አሽሊይ ስቲድ።
“ፍላቭኖይድ ንጥረ ነገር በእለት ተእለት ምግባችን ውስጥ በቋሚነት የሚገኝ ንጥረ ነገር ነው፤ ስለዚህ ዋናው የጥናታችን አላማ የትኛው የአንጀታችን ባክቴሪያ ከፍላቭኖይደስ ጋር ተዋህዶ ለጉንፋን እና ሌሎችኢንፌክሽኖች ተጋላጭነትን ይቀንሳል የሚለው ነው፤ አሁንም ቢሆን በዚህ ለይ የሚቀረን ስራ አለ” ብለዋል።
በዋሽንግተን ዩኒቨርሲቱ የጤና ሳይንስ ትምህርት ቤት የሴንት ሉዊስ ሆስፒታል ተመራማሪዎች የትኛው የአንጀት ባክቴሪያ ከፍላቭኖይደስ ጋር ሊስማማ ይችላል የሚለውን ለመለየት የሰዎች የአንጀት ባክቴሪያ ላይ የተለያዩ ምርምሮችን አካሂደዋል።
በዚህ ምርምራቸውም “ክሎስትሪድየም ኦርቢሳይንደንስ” የተባለ ማይክሮ ባክቴሪያ ያገኙ ሲሆን፥ ይህም ፍላቭኖይድስ የተባለውን ንጥረ ነገር በመስበር የሰውነታችንን በሽታ የመከላከል አቅም እንዲያጠናክር የሚያድርግ ነው ብለዋል።
ለዚህም የእለት ተእለት ምግባችን ውስጥ ፍላቭኖድስን ማካተት እንደ ጉንፋን ላሉ በትንፋሽ የሚተላለፉ በሽታዎች የመጋለጥ እድላችንን እንደሚቀንስም ነው ተመራማሪዎቭቸ ያስታወቁት።
በፍላቭኖድስ ንጥረ ነገር ከበለፀጉ ምግቦች እና መጠጦች ውስጥም፦
ሻይ (በተለምዶ ቀይ ሻይ በማለት የምንጠራው)
ወይን (በተለይም ቀይ ወይን)
ለውዝ
እንዲሁም እንደ ብርቱካን እና ሎሚ ያሉ በሲትሪክ አሲድ በውስጣቸው ያላቸው ፍራፍሬዎች ተጠቃሽ ናቸው።
ምንጭ:- ጤናችን
