NEWS: የተምች ወረርሽኙ በዚሁ ከቀጠለ በምስራቅ አፍሪካ የምግብ እጥረት ሊፈጠር እንደሚችል ፋኦ ገለፀ

                                              

የምስራቅ አፍሪካ ሃገራት በአሜሪካ መጤ ተምች ላይ የተቀናጀ የተባይ ስራ አመራር እርምጃ ካልወሰዱ በቀጠናው የምግብ እጥረት ሊፈጠር እንደሚችል የዓለም የምግብና እርሻ ድርጅት (ፋኦ)ገለጸ።

በድርጅቱ የምስራቅ አፍሪካ ንዑስ ቀጠና ዳይሬክተር ዶክተር ፓትሪክ ኮርማዋ በያዝነው የፈረንጆች 2017 ዓመት መጀመሪያ ላይ፥ በቀጠናው የተከሰተው ሰብል አውዳሚ መጤ ተምች በሁሉም የምስራቅ አፍሪካ ሀገራት መዛመቱን ገልጸዋል።

ከ80 በላይ ሰብሎችን የሚያጠቃው ይህ ተምች በተለይ በቀጠናው ሀገራት ዋነኛ ምግብ የሆነው የበቆሎ ሰብልን በስፋት የሚያጠቃ በመሆኑ ጉዳቱ ዘርፈ ብዙ ሊሆን እንደሚችልም ጠቁመዋል።

በተለይም ከኤል ኒኖ ድርቅ እያገገሙ ያሉ ሀገራት ለችግሩ ይበልጥ ተጋላጭ እንደሚሆኑ አንስተዋል።

አፋጣኝና የተቀናጀ የተባይ ስራ አመራር እርምጃዎች ካልተወሰዱ በምግብ ሰብል ላይ የምርት መቀነስና የዋጋ ንረት ሊከሰት ስለሚችል የቀጠናው ዜጎች ለምግብ ዋስትና እጦት ችግሮች ሊዳረጉ እንደሚችሉም ጠቅሰዋል፡፡

የሚያስከትለውን የምርት ጉዳት ለመቀነስና የዜጎች የምግብ ዋስትና እጦት እንዳይከሰት የቀጠናው ሀገራት የተቀናጀ እርምጃ መውሰድ እንደሚገባቸውም ተናግረዋል።

አሁን ላይም ድርጅታቸው በቅድመ ተባይ መከላከል፣ በቁጥጥር ውጤት ግምገማ፣ በዘላቂ የተምች ስራ አመራርና በትብብር አራት ቁልፍ መንገዶች የተምች መከላከል ማዕቀፍ ቀርጾ ከየሀገራቱ ተጠሪ ተቋማት ጋር በመተባበር እየሰራ መሆኑን አመልክተዋል።

ተምቹን ለመከላከልም የተቀናጀ የመረጃ ልውውጥ ስርዓት ካልተዘረጋና ሃገር አቀፍ፣ ክፍለ አህጉርና አህጉር አቀፍ በሆነ መልኩ በቅንጅት ሊሰራ ይገባል ነው ያሉት፡፡

በምስራቅ አፍሪካ የልማት በይነ መንግስታት (ኢጋድ) የምግብ ዋስትና ስነ ምግብ ባለሙያ አብዱል ሱልማን ኢልሆዎርልስ በበኩላቸው፥ ቀጠናው የምግብ ዋስትና ችግር እንዳለበት ገልጸዋል።

በቀጠናው ለተጀመሩ የተምች መከላከልና መቆጣጠር ፕሮጀክቶች ተፈጻሚነትም ኢጋድ ድጋፍ እንደሚያደርግ አብራርተዋል።

በኬንያ የአሜሪካ ዓለም አቀፍ የልማት ድርጅት /ዩ ኤስ አይ ዲ/ ተወካይ ዶክተር ትሬሲ መክረኬን ድርጅቱ መጤ ተምቹን ለመከላከል በሚደረገው ጥረት የአዋጭ ቴክኖሎጂና የአቅም ግንባታ ድጋፉን ያደርጋል ብለዋል፡፡

ተምቹ በኢትዮጵያ ከ500 ሺህ ሄክታር በላይ የበቆሎ ማሳ ላይ የተዛመተ ሲሆን ሩዋንዳና ኬንያ በስፋት ተምች የተስፋፋባቸው ሀገራት ናቸው።

ለመጀመሪያ ጊዜ በዚህ ዓመት መባቻ በምዕራብ አፍሪካ የተከሰተው የአሜሪካ መጤ ተምች በ25 የአፍሪካ ሃገራት ሲዛመት ናይጀሪያ 700 ሺህ ሄክታር የበቆሎ ማሳ በተምች ወረርሽኙ የተጠቃች ቀዳሚዋ ሀገር ናት።

ምንጭ:- ኤፍ ቢ ሲ(FBC)

 

 

Advertisement