NEWS: የተራዘመው የሳዑዲ የምህረት አዋጅ ዛሬ ይጠናቀቃል::

                                      

በስላባት ማናዬ

የሳዑዲ አረቢያ መንግስት የስራ እና የመኖሪያ ፈቃድ የሌላቸው ዜጎች ሀገሪቱን ለቀው እንዲወጡ ያራዘመው የእፎይታ ጊዜ ዛሬ ይጠናቀቃል።

የውጭ ጉዳይ ሚኒስቴር ቃል አቀባይ አቶ መለስ አለም ከፋና ብሮድካስቲንግ ኮርፖሬት ሞጋች የክርክር እና የውይይት መድረክ ጋር ባደረጉት ቆይታ፥ “ሪያድ ቀነ ገደቡ ሲጠናቀቅ ልታሳልፈው የምትችለው ውሳኔ ከእኛ ውጭ ቢሆንም መንግስት ዜጎች እንዲመለሱ የማድረጉን ስራ አጠናክሮ ይቀጥላል” ነው ያሉት።

የጉዞ ሰነድ ወስደው በተለያዩ ምክንያቶች የወሰዱት ሰነድ ጊዜው ያለፈባቸው በርካታ ዜጎች በመኖራቸውም የጉዞ ሰነድ እንዲሰጣቸው ከሌሎች ሀገራት ጋር በመሆን ከሳዑዲ መንግስት ጋር እየተወያየን ነው ብለዋል።

እስከዛሬ ድረስ የጉዞ ሰነድ ያልወሰዱ ዜጎች ለሚደርስባቸው እንግልት ሃላፊነቱ የራሳቸው ቢሆንም መንግስት የዜጎቹ ጉዳይ ስለሚያሳስበው አስፈላጊውን ስራ እየሰራ መሆኑንም ነው ያነሱት።

ቃል አቀባዩ ከመንግስት ጎን ለጎን ሳዑዲ የሚገኙ ዜጎች፣ ቤተሰቦች እና መገናኛ ብዙሃን አዋጁ የሚመለከታቸው ዜጎች የጉዞ ሰነድ በመውሰድ ወደ ሀገራቸው እንዲመለሱ የማያቋርጥ ቅስቅሳ ማድረግ እንዳለባቸውም ጥሪ አቅርበዋል።

መንግስት የጉዞ ሰነድ ወስደው ያልተመለሱም ሆነ ገና ያልወሰዱ ዜጎች ወደ ሀገራቸው እንዲመለሱ ለማድረግ ያላሳለሰ ጥረት እያደረገ እንደሚገኝና ይህ ጥረቱም ተጠናክሮ እንደሚቀጥል አመላክተዋል።

የውጭ ጉዳይ ሚኒስቴር ዜጎችን የማስመለስ ስራ ብቻ ሳይሆን በሀገራቸው ከወገኖቻቸው ጋር ዳግም የሚቋቀቋሙበትን ስራም እንደሚሰራም ነው አቶ መለስ የተናገሩት።

ቃል አቀባዩ በአሁኑ ወቅት ወደ ሀገራቸው የተመለሱ ዜጎች አጠቃላይ መረጃ እየተመዘገበ መሆኑን ገልፀው፥ በቀጣይም በአጠቃላይ በሚካሄዱ ስራዎች ላይ ይፋዊ መረጃ እንደሚሰጥ ጠቁመዋል።

ቃል አቀባዩ እስከ ትላንት ረፋድ ድረስ 130 ሺህ የሚሆኑ ኢትዮጵያዊያን የጉዞ ሰነድ መውሰዳቸውን አንስተዋል።

ከእነዚህ ውስጥ ወደ ሀገራቸው የገቡት 70 ሺህ የሚጠጉ ዜጎች መሆናቸውንም አብራርተዋል።

 

ምንጭ:- ኤፍ ቢ ሲ(FBC)

 

 

 

Advertisement