NEWS: በዓለም የመጀመሪያው ተንሳፋፊ የንፋስ ሃይል ማመንጫ ተገነባ

                                          

በዓለም የመጀመሪያው ሙሉ በሙሉ ተንሳፋፊ የሆነው የንፋስ ሃይል ማመንጫ በስኮትላንድ የባህር ዳርቻ ተገነባ።

የንፋስ ሃይል ማመንጫው ወደ ውሃ ውስጥ በመስረግ እየተንሳፈፈ የንፋስ ሃይል ማመንጨት ያስችላል ተብሏል፡፡

ፔተርሄድ የንፋስ ሃይል ማመንጫ ሀይዊንድ የሚል ስያሜ ያለው ሲሆን ለ20 ሺህ ቤቶች የሃይል አቅቦት እንዲያመነጭ ታልሞ የተሰራ ነው።፡

የቴክሎጂው አምራች ስታቶይል የተባለው ኩባንያ ተንሳፋፊው የንፋስ ሃይል ማመንጫዎቹ ከፍተኛ አቅም እንዳላቸው ጠቅሷል፡፡

በቀጣይም የቴክሎጂውን ተደራሽነት ጥልቅ የውሃ አካል ባላቸው እንደ አሜሪካ እና ጃፓን ባሉ ሀገራት ለማስፋፋት አቅዷል፡፡

የሃይዊንድ ፕሮጀክት ዳይሬክተሩ ሌይፍ ዴልፕ ይህ ተንሳፋፊ የሃይል ማመንጫ ለኤሌክትሪክ ሃይል የሚወጣውን ወጪ ለመቀነስ እንደሚያስችል ጠቁመዋል፡፡

ከግዙፍ የሃይል ማመንጫ ተርባይኖቹ መካከል አንዱ ወደ ሙከራ የገባ ሲሆን አራቱ በዝግጅት ላይ መሆናቸውን ተናግረዋል፡፡

በወሩ መጨረሻም ከፔተርሄድ የሃይል ማመንጫ ፕሮጀክት 15 ማይል ርቀት ላይ በባህር እየተንሳፈፉ ሃይል የማመንጨት ስራቸውን ይጀምራሉ ተብሏል፡፡

ተርባይኖቹ በባህር ውስጥ እስከ 78 ሜትር ጥልቀት ድረስ በመግባት የሃይል ማመንጨት ሽክርክሪታቸውን የሚያደርጉ ይሆናል።

በስታቶይልና በአቡ ዳቢው ማስዳር ግሩፕ የሚተገበረው ይህ ፕሮጀክት ንጹህ የታዳሽ ሃይልን ለመጠቀም ለሚደረገው ጥረት ወሳኝ ነው እየተባለ ነው።

ከዚህ ባለፈ ግን በስኮትላንዳውያን ዘንድ ስጋትንም አጭሯል።

ይህ ፕሮጀክት ግዙፍ የሃይል ማመንጫ ተርባይኖችን ይዞ በባህር ዳርቻዎች ላይ እንደመተከሉ መጠን፥ ለባህር ላይ ወፎች ስጋት ነው ብለዋል ስኮትላንዳውያኑ።

እናም በዚያ አቅራቢያ ያሉ አዕዋፋት እንዳይጎዱና የእነርሱን ህልውና አደጋ ላይ በማይጥል ሁኔታ ሊተገበር ይገባልም ነው ያሉት።

ተርባይኖቹ ከግዝፈታቸው አንጻር በአካባቢው በሚኖሩና በሚንቀሳቀሱ የባህር አዕዋፋት ላይ አደጋን እንዳያስከትሉ ተሰግቷል።

ተመራማሪዎች ደግሞ መንግስታት ከብክለት የፀዳ አካባቢ ለመፍጠር የገቡትን ቃል ለመተግበር መሰል ፕሮጀክቶችን ያስፋፉ ዘንድ ጠይቀዋል።

ምንጭ:- ኤፍ ቢ ሲ(FBC)

 

Advertisement