SPORT:ወልዋሎ አዲግራት ዩኒቨርሲቲ እና ጅማ ከተማ ወደ ኢትዮጵያ ፕሪምየርሊግ ተቀላቀሉ

የከፍተኛ ሊግ ውድድር ዛሬ ሲጠናቀቅ ወልዋሎ አዲግራት ዩኒቨርሲቲ እና ጅማ ከተማ ወደ ኢትዮጵያ ፕሪምየርሊግ የተቀላቀሉ ቡድኖች መሆናቸውን አረጋግጠዋል።

 ዛሬ ከ 9:00 ጀምሮ ተጠባቂ የነበሩት ሶስት ጨዋታዎች በተለያዩ ክልሎች ሲደረጉ ወልዋሎ አዲግራት ዩኒቨርሲቲ ከመቐለ ከተማ ጋር አቻ ሲለያይ ጅማ ከተማ በበኩሉ ወልቂጤ ከተማን በማሸነፉ በ 2010 ዓም የኢትዮጵያን ፕሪምየር ሊግ የተሳትፎ ትኬት ቆርጠዋል።

በምድብ ሀ ወልዋሎ አዲግራት ዩኒቨርሲቲ ባለፈው ሳምንት መቐለ ከተማ አቻ ከተለያየ በኋላ የማለፍ እድሉ ሙሉ ለሙሉ ባይረጋገጥም ወደ ፕሪምየርሊጉ ተቀላቅሏል ለማለት በሚያስደፍር መልኩ መጠጋቱ ይታወሳል።

መቐለ ከተማ በበኩሉ ወደ ፕሪምየርሊጉ ለመቀላቀል ወልዋሎ አዲግራት ዩኒቨርሲቲን ቢያንስ 7-0 የማሸነፍ ከባድ ፈተናን ድራማዊ በሆነ መንገድ መቀልበስ ይጠበቅበት ነበር።

63 እና 60 ነጥብ ይዘው ዛሬ እርስበርስ የተጫወቱት ወልዋሎ አዲግራት ዩኒቨርሲቲ እና መቐለ ከተማ ሳይሸናነፉ 1-1 በሆነ ውጤት በማጠናቀቃቸው ወልዋሎ ወደ ፕሪምየርሊጉ መቀላቀሉ አረጋግጧል።

እጅግ አጓጊ በነበረው የምድብ ሁለት ጨዋታ ደግሞ በጅማ ከተማ የበላይነት ተጠናቋል።ጅማ ከተማ ከ ወልቂጤ ከተማ ጋር ያደረገው የሜዳውን ወሳኝ ጨዋታ 3-1 በማሸነፉ ወደ ፕሪምየርሊጉ ተቀላቅሏል።

ጅማ ሌላኛው የከተማዋ ተወካይ ጅማ አባቡና ከፕሪምየርሊጉ ቢወርድም ሌላ ተወካይ ቡድን አግኝታለች።በዚህ ምድብ ሀዲያ ሆሳእና ከ ሀላባ ከተማ ጋር ሳይሸናነፉ በአቻ ውጤት በማጠናቀቃቸው ሀድያ ሆሳእና ምድቡን ሁለተኛ ሆኖ ማጠነቀቅ ችሏል።በዚህም መሰረት ወልዋሎ እና ጅማ ከተማ በቀጥታ ወደ ፕሪምየርሊግ የተቀላቀሉ ቡድኖች ሲሆኑ ሀዲያ ሆሳእና እና መቐለ ከተማ ደግም ከምድባቸው ሁለተኛ ሆነው በማጠናቀቃቸው በጥሎ ማለፍ ይፋለማሉ።

አሸናፊ የሚሆነው ቡድን ወደ ፕሪምየርሊጉ የሚቀላቀል ሶስተኛ ቡድን ይሆናል።የጥሎ ማለፉ ጨዋታው በሀምሌ አጋማሽ ላይ በድሬደዋ እንደሚደረግ ይጠበቃል።

ምንጭ:- FBC

Advertisement