ህገ-ወጥ አሳ አስጋሪዎች በሀዋሳ ሀይቅ የዓሣ ሀብት ላይ አሉታዊ ተጽእኖ እየፈጠሩ ነው – Illegal Fishing is Said to be The Cause for The Decline of Fish Population in Lake Awassa.

                                                 

በብርሃኑ በጋሻው

በሀዋሳ ሀይቅ ህገ-ወጥ አሳ አስጋሪዎች ተገቢ ባልሆነ መረብ በማስገር በአሳ ሀብቱ ላይ ተጽእኖ እየፈጠሩ መሆኑን የከተማዋ ነዋሪዎችና በሀይቁ ዙሪያ አገልግሎት በመስጠት እየተጠቀሙ የሚገኙ ግለሰቦች ተናግረዋል ፡፡

አስተያየታቸውን ለፋና ብሮድካስቲንግ ኮርፖሬት የሰጡ አስተያየት ሰጪዎች እንደተናገሩት፥ ህገወጥ አሳ አስጋሪዎቹ ባልተገባ ሁኔታ አሳዎችን እንቁላል ሳይጥሉ ማስገራቸው የሀይቁ የአሳ ሃብት እንዲቀንስ አድርጎታል፡፡

የማጥመድ ስራውም ማንኛውንም አሳ ለማጥመድ ከውጭ ሀገር በመጣ ማጥመጃ እያከናወኑ መሆኑም ጫና እየፈጠረ መሆኑ ተነግሯል፡፡

ይህ ደግሞ ትናንሽ አሳዎችን ከሀይቁ በማውጣት ተተኪ እንዳይኖር ያደርገዋል ነው የተባለው፡፡

የሀዋሳ ከተማ ከንቲባ አቶ ቴዎድሮስ ገቢባ በሀይቁ ላይ የተሰማሩ ህጋዊ እና ህገወጥ አስጋሪዎች፥ የሚያሰግሩበትን መንገድ እንዲያስተካክሉ የግንዛቤ ስራ እየተሰራ ነው ብለዋል፡፡

አሳ የሚያሰግሩበት ማስገሪያ በተቀመጠለት ደረጃ እንዲሆን ለማስቻል፥ እየተሰራ ሲሆን እርምጃ ለመውሰድም ታቅዷል፡፡

ሀይቁ የኦሮሚያ ክፍል አዋሳኝ በምዕራብ አርሲ ዞን ከ300 በላይ ወጣቶች በማህበር የስራ እድል ተፈጥሮላቸው፥ በቢሻን ጉራቻ ሐይቅ ዳርቻ ተሰማርተው እየሰሩ ሲሆን፥ በህገወጥ መንገድ አሳ የማስገሩም በእነሱ በኩልም እየተከናወነ ነው፡፡

የዞኑ የእንስሳትና አሳ ሃብት መምሪያ ሃላፊ ዶክተር አብዱላሂ ቤካ፥ የወጣቶቹን በህገወጥ መንገድ አሳ የማስገር ችግር አምነው፥ ከፌደራልና ከደቡብ ክልል የሚመለከታቸው አካላት ጋር በመሆን እርምጃ እየወሰድን ነው ብለዋል፡፡

በዚህም ከቢሻን ጉራቻ ከተማ ጋር በመተባበር ህገወጥ የማስገሪያ መረብ በቁጥጥር ስር እንዲውል ተደርጎ እንደነበር ነው ያስታወሱት፡፡

በቀጣይም በዚህ ህገወጥ ተግባር የሚሰማሩ ግለሰቦች ወደ ህግ ለማቅረብና ማስገሪያቸውም ከጥቅም ውጭ ለማድረግ መታቀዱን ጠቁመዋል፡፡

በሌላ በኩል ከአሳው ምርት መቀነስ ባሻገር የአሳ ዋጋ፥ ከጊዜ ወደ ጊዜ እየጨመረ መሆኑን አስተያየት ሰጪዎች ይናገራሉ፡፡

የደቡብ ክልል እንስሳትና አሳ ሃብት ልማት ቢሮ ዶክተር አህሚ ጀማል በበኩላቸው፥ ተገቢ ባልሆነ መረብ የሚያሰግሩ ማህበራት ከሃዋሳም ከኦሮሚያ ክልል መኖራቸው የተለየ ሲሆን እርምጃ እየተወሰደ ነው ብለዋል፡፡

ሃላፊው ህገወጥ አሳ የማስገር ተግባራት በሃይቁ የአሳ ሀብት ላይ አስጊ ሁኔታ በመፍጠሩ፥ እንቁላል ለመጣል የተዘጋጁ እና ጫጩት አሳዎችን እንዳያሰግሩ የማስገንዘብ፥ በተጨማሪም ሌሎች የአሳ ዝርያዎችን ከውጭ በማምጣት ችግሩን ለመቅረፍ ጥረት እየተደረገ መሆኑን አንስተዋል፡፡
ምንጭ:- ዋልታ

 

 

Advertisement